اللعبة
درفت أول / إياد جربوع
الأشخاص / مسعود ( بائع جرائد ) ، شاب أول ، الاعمي ..
المكان / شارع عام ..
مسعود / قدس .. أيام ... نهار .. اشتري جريدة اعرف الحقيقة ، اشتري جريدة ...
( و ينادي علي بضاعته )
( يدخل شاب يتحدث في الهاتف )
الشاب / كلو تمام ، المهم أنت ما يكون عندك فكر ، الفلوس راح تجيك بالمعاد اللي اتفقنا عليه ..
مسعود / الله يمسيك بالخير
الشاب / اهلا
مسعود / جريدة
الشاب / لا
مسعود / جريدة
الشاب / بقلك لا ,, أنت بتسمعش
مسعود / كلها بشيكل
الشاب / بديش
مسعود / بلاش
الشاب / هات ورجيني
مسعود / ايوه هيك
الشاب / اسمع أنا معيش ولا مليم , بس راح أخدمك خدمة بحق الجريدة
مسعود / خدمة ايش
الشاب / في بآخر الشارع بلاعة مجاري فاتحة و بيقعوا فيها ناس كثير ، خد بالك منها
مسعود / لا متخافش أنا لافف و داير و حافظ كل بلاعات البلد
الشاب / يلا باي
مسعود / و حق الجريدة
الشاب / و النصيحة
مسعود / وفرها لغيري
الشاب / ما بدي جرايدك خذ , و الحق عليا ، و ان شاء الله بتوقع فيها ( يكون قد قرأ الجريدة )
مسعود / الله لا يوفقك بعد ما قريت الجريدة , زبون آخر زمن لا و جوال و المصاري , الواحد بيقول يا صباح يا فتاح و جاي يقلي بلاعة ( ينادي علي بضاعته )
( يدخل رجل تقوده عصا .. إلي ان تصطدم عصاته برأس مسعود )
مسعود / ( دون النظر إليه ) سايب كل الطريق و جاي من هان
الاعمي / يحرك بعصاه برأس مسعود
مسعود / يا عم هي الطريق ،، شو أنت انعميت ( ينظر إليه ) نهارنا كحلي طلع اعمي حقيقي
الاعمي / أنا مش اعمي انتو العميان
مسعود / و كمان مجنون
الاعمي / لا اعمي ولا مجنون
مسعود / يا سلام
الاعمي / أنت اللي مش عارف وين قاعد
مسعود / أنا طول اليوم بالفلف لما انهروا رجليا يعني مش ناقصك , الله يساهل عليك
الاعمي / أنت لسانك زفر باين عليك و قوم من الطريق
مسعود / الطريق طريق الحكومة و أنا اقعد وقت ما بدي و زي ما بدي
الاعمي / ( يضحك )
مسعود / ليش بتضحك
الاعمي / لأنك مش عارف ايش بتقول
مسعود / ليش
الاعمي / لأنو لو كل واحد عمل مثلك و قعد وين ما بدو كان لقيتنا زمان في يافا ولا في حيفا ... كان الحين قعدنا بالقدس
مسعود / طيب يا فيلسوف الغبرة ... انا عارف انو نهاري اليوم كحلي
الاعمي / لكن قلي أنت ايش بتعمل قاعد في الشارع
مسعود / قاعد و أنت ليش بتسال
الاعمي / كل يوم باعبر من هان ما بلاقي حدا قاعد ... محدش فاضي .. الكل بيجري ..
مسعود / وين بيجري الكل
الاعمي / اللي بتلاقيه قاعد علي باب النقابة و اللي بيروح علي الجمعيات ,, كل بيجري علي لقمة عيشه ...
مسعود / منا قاعد علشان هيك , يعني اجت عليا
الاعمي / طيب أنت ليش قاعد
مسعود / الأخبار , طول اليوم باجري و ما حدا عبرني و اشتري جريدة
الاعمي / ( يضحك ) ما سالت حالك ليش
مسعود / يعني أنت عارف ليش
الاعمي / لأنه نص الناس عارفة الأخبار و النص الثاني ما بتهمه الأخبار
مسعود / و انا كيف أروح وايش اعمل
الاعمي / ولا يهمك انا باشتري منك جريدة
مسعود / ( يضحك ) أنت بدك تشتري جريدة
الاعمي / تضحك بلا أسنان هو انا قلت نكتة
مسعود / لأنو ولا حدا مفتح اشتري جريدة و الاعمي بدو جريدة ايش هالزمن
الاعمي / العمى عمي القلب يا اعمي القلب ,, و مع رزالتك بدي اشتريها بس لأساعدك .. رغم إنها ما تلزمني لأني عارف شو فيها
مسعود / عارف ايش فيها
الاعمي / عارف كل اللي بالجرايد ... آه
مسعود / يعني أنت بدك تقنعني انك عارف ايش مكتوب بجريدة اليوم
الاعمي / و جرايد بكرة و بعده و بعده و بعده
مسعود / لو عرفت ايش مكتوب بدي أعطيك الجريدة ببلاش
الاعمي / امسك الجريدة و افتح الصفحة الأولي
مسعود / و هي الصفحة الأولي
الاعمي / مكتوب بالخط الأحمر الكبير و النقط السودا اللي مثل وجهك ,, إسرائيل نازلة قتل و تدمير و تجريف الأخضر و اليابس في كل مكان
مسعود / ( باستغراب ) إسرائيل تواصل حملتها العسكرية دون رادع و تقوم بارتكاب المجازر و سقوط العديد من الشهداء
الاعمي / و اسمع الخبر الثاني في جريدك الثانية الدول العربية تنهض من غفوتها و تقوم بعقد قمة عربية علشان حصار غزة
مسعود / الله لا يوفقك ... كيف عرفت المكتوب .. لا أنت مش اعمي
الاعمي / يا بنية هاي مش أخبار
مسعود / ها ايش
الاعمي / لعبة الها دفاع و هجوم و تكتيك
مسعود / و أحنا اللعبية
الاعمي / لا أحنا الكورة
مسعود / الكورة ,, طيب استني علشان بس اتاكد معي آخر جريدة ايش مكتوب فيها
الاعمي / برضوا مش مصدق , أنت ايش اسمك
مسعود / مسعود
الاعمي / مكتوب أم فلسطينية بتفقد كل أولادها و بظل فرحانة و بتقول بكل شموخ في جواتي مولود بكرة بيكبر و بياخد ثار إخوانه ...
مسعود / معقول ,, أنت مش طبيعي
الاعمي / صدقت يا مسعود
مسعود الله لا يسعدك .. انا ما ظل عندي عقل .. انا انجنيت .. لو كل الناس زيك ما حدا بيفكر يشتري جريدة ولا حتى يشوف التلفزيون
الاعمي / يا بنية اخباركو مبينة
مسعود / كيف
الاعمي / اسأل الطفل الصغير بيقلك الأخبار
مسعود / الحين عرفت
الاعمي / ( يتجه ناحية الباب للخروج ) بدي أقلك خبر لسة ما أتكتب بجرايدك ولا راح بنكتب
مسعود / ولا راح ينكتب ( باستغراب )
الاعمي / صحوة الضمير العربي ، صحوة الضمير العربي , صحوة الضمير العربي
مسعود / والله الراجل قلب عقلي .. راجل غريب ..( ينادي علي بضاعته ) ( يتفاجئ ) هــ نسيت أقول للاعمي عن البلاعة ( يتجه مسرعا ناحية الباب ) ( صوت من الخارج يدلل علي وقوع الاعمي ) ( يخرج مسعود و يعود مسرعا )
مسعود / الاعمي مات ,, وقع في البلاعة .. بس ما قلي شو نهاية هاللعبة ... شو نهاية اللي أحنا فيه .. لا بيس هو قلي أسال الطفل الصغير بس نسي يقلي اسأله هالقيت ولا يكبر .. ( يرمي بالجرايد علي الأرض ) هاي مش أخبار هاي لعبة ايون لعبة صحيح كلامه ,, انا بدي الحقيقة بدي اعرف الحقيقة
نهاية
أبو سلمى