( حقي يا ناس )
المكان / منزل
الاشخاص / ابو خالد – ام خالد – خالد- ابو حامد
( صوت من الخارج )
ابو خالد / هتروحي يعني هتروحي
ام خالد / اعطيني الايجار
ابو خالد / معيش
( تدخل ام خالد )
ام خالد / انا صابرة بس علشان ولادي و علشان اهلي .. و مش عارفة ايش اعمل مع هالراجل ... كيف لونو طويل ولا الو شعر ... بيتحكم فيا و كاني جارية شريها من السوق .... انا زهقت هالعيشة
ابو خالد / للحين ما طلعتي
ام خالد / حاضر
ابو خالد / تتاخريش
( يدخل خالد )
خالد / كل يوم مشاكل
ام خالد / قول لابوك
خالد / انت وين رايحة
ام خالد / اسال ابوك
خالد / ايش يابا
ابو خالد / شمعت فيه كبونات
خالد/ متروح انت
ابو خالد/ مش فاضي
ام خالد / و ايش وراك
ابو خالد / فش ورايا اشي
خالد / يبقي روح انت
ام خالد / يسلم تمك
ابو خالد / انا بدي اعلمها
ام خالد / ايش تعلمني
ابو خالد / اعلمك زي النسوان اللي باشوفها
خالد / هو انت بتشوف نسوان يابا
ابو خالد / اخرس .. اه بشوف نسوان طالعين نازلين .. بيشتغلن و بيجيبن مصاري ....
خالد / خلص يمي روحي .. الله يعينك
( تخرج ام خالد و هي تتمتم )
خالد / هيني وزعتها
ابو خالد / شاطر طالع لابوك
خالد / ايش عملت بموضوعي
ابو خالد / موضوع ايش
خالد / بدي اتجوز
ابو خالد / بس تكبر .. انت لسة ما طلعت من البيضة ..
خالد / انت وعدتني
ابو خالد / بس اجوز اختك و اخلص منها
خالد / لسة بدي استني اختي اللي لسة عمرها 13 سنة
ابو خالد / لالا منا خلصت موضوعها
خالد / كيف
ابو خالد / حكي مع ابو حامد
خالد / تاع الدكانة
ابو خالد / ايوة تاع الدكانة زلمة مليان مصاري ...
خالد / و امي هترضي
ابو خالد / ايش ترضي و ما ترضي ان شاء الله ما رضيت ...
خالد / كيف يابا
ابو خالد / انا هان الكل في الكل انا الحاكم و السلطان و الجلاد .. بعدين هالراجل مش ماتر عليه لاحصار ولا وضع سياسي ولا حاجة
خالد / و انا
ابو خالد / انت ايش
خالد / انا بدي اتجوز
ابو خالد / يا اهبل خليك هيك احسن
خالد / بدي اتجوز .. بدي اضرب و اكسر زيك
ابو خالد / بس علشان هيك
خالد / لا كمان علشان يطلع لي بطالة
ابو خالد / والله كلامك صح
خالد / و كل ما كثرت ولاد اسرعت البطالة
ابو خالد / و زادت الكابونات ....
خالد / بعدين اقلك حاجة
ابو خالد / قول
خالد / انا بعرف واحد عامل مشروع نفسي اعمل زيه
ابو خالد / مشروع ايش
خالد / مجوز تلات موظفات و قاعد رجل علي رجل و اخر الشهر بيلم الغلة
ابو خالد / انت وين كاين عني زمان
خالد / ايش رايك يابا
ابو خالد / خلص هاحل موضوعي
خالد / و انا
ابو خالد / اخرس انت ... انا مفكر لك فكرة حلوة
خالد / حبيبي يابا ايوة فكر فكر
ابو خالد / روح الحين اشتري علبة دخان علشان اعرف افكر
خالد / طيارة
( تدخل ام خالد و يرجع خالد )
خالد / مالك يمه
ام خالد / راسي بدو يتفجر
ابو خالد / سبعة ولا ضبعة
ام خالد / لا سبعة ولا ستة
ابو خالد / يعني ما عملتي حاجة ..
ام خالد / راسي يا ناس
خالد / مين بيوجعك يمة
ام خالد / راسي
خالد / تعالي اخدك علي الدكتور
ابو خالد / لا لي ليش دكتور الحين بطيب لحالها من زمان هي هيك
خالد / حاضر يابا بلاش دكتور
ام خالد / بدي اموت
ابو خالد / ( يرفع ايده )
خالد / مالك يابا
ابو خالد / بادور لامك علي أي حبه دوا
(صوت من الخارج ينادي .. ابو خالد )
ام خالد / مين هذا
خالد / ابو حامد
ام خالد / و ايش بدوا ابو حامد
ابو خالد / تعال .. تفضل يا خويا .. تفضل يا ابو حامد
ابو حامد / مرحبا يا ابو خالد
ابو خالد / حبيبي يا وجه السعد
ابو حامد / ايش عملت بالموضوع تبعي
ابو خالد / جاهز
خالد / اه جاهزين
ابو حامد / طيب متي راح نكتب
ام خالد / تكتبوا ايش
ابو حامد / الكتاب
ام خالد / ابو خالد عمرو ما كتب اسمو ... كتاب مرة وحدة
خالد / هههه لا يمة
ام خالد / حاسة في مصيبة
خالد / لا يمة في فرح .. ابو حامد بدو يتزوج اختي عبير
ام خالد / ايش
ابو خالد / اه و اتفقت معه ناخد بنت ابو حامد الموظفة لخالد بدل عبير
ام خالد / ايش هي سلعة رخيصة ...
ابو خالد / ما لك حكي
ام خالد / مستحيل هالكلام يصير
ابو خالد / غصب عنك
( يرتفع الصوت تدريجيا بكلام غير مفهوم )( بعد الهدوء ...)
ام خالد / طول ما انا في هالبيت عبير مش راح تتزوج ابو حامد
ابو خالد / انت مش هظلي بالبيت
خالد / كيف
ابو خالد / انا باقلك كيف .. امك طالق
الجميع / ايش ( لوحة )
ام خالد / زي ما شفنا هالقصة موجودة و بيصير اكتر من هيك ... بس مش كل الناس هيك ... المراة مش سلعة رخيصة نبيعها و نشريها .. المراة الها حقوها و كمان عليها واجبتها ...
خالد / و احنا مثلنا هالقصة لنقول للكل انو المراة و خاصة في غزة بيصير فيها كتير و كتير و ياما جرايم و عنف كبير صار بحقها
ابو خالد / صحيح و بنقول اعطوا المراة حقها في التعليم و حرية الراي و العمل كمان
ابو حامد / و حقها انها تكون انسانة
موضوع: حقي يا ناس 
21/1/2009, 6:53 am
||آلـعـمـــر||
