جمالك من جمال حواجبك

شوفي يا قمر السبب في كده هو إنك أكيد مش مهتمة بشكل حواجبك وده لأن الحواجب المرتبة المتناسقة مع بعضها بتدي للوجه مظهر أنيق على عكس طبعا الحواجب غير المترتبة وغير المتناسقة مع بعضها.....وأكيد طبعا أنت زي كل البنات بتخافي إنك تروحي للكوافير علشان البنت بتعمل لك بسرعة جدا وأنت بشرتك مش بتستحمل أو لأنك مش فاضية تروحي كل يوم والتاني للكوافير.
طيب إيه رأيك لما تبدئي بنفسك تنظفي حواجبك في البيت بنفسك وتشيلي منها الشعيرات النامية على جنب علشان مظهر حواجبك يكون حلو وبكده تضمني إنك تخلي شكلهم وحجمهم زي ما أنت عايزة..

وعلشان محدش يفهم كلامنا غلط إحنا بنأكد إننا عايزينك تنظفيهم من غير ما تغيري شكلهم يعني من الآخر كده من غير ما ترفعيهم ولا تعمليهم تمانيات ولا سبعات ولا ترسميهم علشان ماتدخليش في حرمانية يعني من الآخر كده العملية هتقتصر على عملية تنظيف بسيطة تقومي أنت بيها بنفسك.
الأدوات اللي هتحتاجي لها..

أول وأهم حاجة المفروض تعمليها هي إنك هتقفي قدام المرايا وتبصي لحواجبك كويس وده علشان تعملي دراسة لشكل حواجبك وتشوفي أنت عايزة تشيلي إيه بالضبط وممكن ترسمي بالقلم الأسود خط على المكان اللي هتشيلي منه الشعر....بس خدي بالك كويس إنك لو حاسة إنك مش هتقدري تظبطي لنفسك الموضوع ده يبقى ممكن تروحي الكوافير وتنظفي حواجبك هناك أول مرة وبعد مرور أسبوع تبدئي بنفسك في إزالة الشعر اللي لسه طالع أول بأول بنفس الطريقة اللي بنتكلم عليها دي.

ويا ريت تبتدي بالشعر الزائد الموجود أسفل الحاجب وبعد ما تخلصي تبتدي تمشطي حواجبك إلى أسفل وتشيلي الشعر الزائد الموجود أعلى الحاجب، وبعد كده تبتدي في تمشيط حواجبك إلى أعلى وتقصي الأطراف بشكل متساوي وبعد كده تمشطيها لأسفل وتقصي الأطراف من أسفل..وبكده تبقي أنت خلصتي.. أعتقد إنه موضوع سهل ومش هياخد منك غير ربع ساعة وبس.
وعلشان أكون عملت كل اللي علي في الموضوع ده عايزاك تكوني حاطة في بالك الكام نقطة دول:

1- أحلى حاجة في الدينا أن يكون لك شكل خاص بك علشان كده مش عايزاك تقلدي حد وتختاري رسمة حواجب زي حد وده لأن كل بنت لها شكل خاص بها وطبعا شكل الحاجب الأصلي هو المناسب لعينيك ولوجهك.
2- إن موضة الحواجب الرفيعة اللي على شكل 8 واللي انتشرت منذ فترة اختفت تماما والحمد لله إنها اختفت وده لأنها كانت بتدي للبنت شكل أكبر من سنها علشان كده عايزاك دايما تبقي عارفة إن الحواجب الرفيعة بتخلي الوجه يبان كأنه أكبر سناً لكن الحواجب العريضة نوعا ما بتدي الوجه شكل أجمل وأحلى.
3- أحسن وسيلة لتنظيف شعر الحواجب هي الملقاط والفتلة واوعي تسمعي كلام أي حد يقولك استخدمي "الشمع" أو "السويت" وده لأن الاثنين دول بيكونوا السبب في ظهور التجاعيد في سن مبكر في جلد الوجه بالذات.
4- لازم تهتمي دايما بحواجبك وده عن طريق تسريحهم بفرشاة الحواجب اللي عندك في البيت،كمان ممكن تجيبي قطنة فيها زيت الخروع وتمسحي بيها حواجبك.. كمان لازم تهتمي بتنظيف حواجبك بالمستحضر اللي بتسخدميه في إزاله الماكياج من العينين وده علشان تتخلصي من أي تراب أو غبار ممكن يتراكم في شعر الحواجب.
5- خدي بالك إن أفضل وقت تقدري تشيلي فيه أي شعر زائد هو بعد الاستحمام مباشرة وده لأن الجلد في الوقت ده بيكون رطب وهيساعدك تشيلي الشعر من غير ما تحسي بأي ألم.

ولغاية هنا وخلص كلامنا النهارده
بس قبل ما نقول سلام

يسلمووو دياتك يا عيونى